Quercus Staatmaker blog

Werwing met ‘n verskil

2009-05-12T11:14:00.003+02:00

Op 27 Januarie het ‘n paar van ons Staatmakers die Eerstejaar bemarkings stalletjie in die Neelsie beman. Daar was ‘n fotobord met foto’s van Staatmaker gebeure van 2008, ‘n skootrekenaar met ‘n “slide show” van foto’s en pittige plakkate wat die Staatmaker bemarking slagspreek van 2009: “Dit klink net beter in Afrikaans” uitgebeeld het. By hierdie stalletjie kon beide nuwe en ou Staatmaker lede inskryf, en ook sommer ‘n voorsmakie kry oor wat beplan word vir die eerste kwartaal se aktiwiteite, onder andere ‘n wyntoer en bybelstudie klasse, wat net lekker kan raak.

Vuurhoutjie boksies wat deur baie vlytige Staatmakers aanmekaar gesit is, is ook uitgedeel wat hopelik sal sorg dat meer mense van die Staatmakers te hore sal kom, en so hopelik die ledetal vir 2009 sal vergroot. Die vlymskerp bemarkings poging was ‘n bron van vele glimlagte, veral wanneer die slagspreek: “Stink-mouse-dog, dit klink net beter in Afrikaans” gelees is. Die dag was lank, maar redelik suksesvol en die bemarkings span onder leiding van Rose Marie kan geluk gewens word met ‘n baie indrukwekkende campaign, waarvan die plakkate definitief gewild sal wees op kampus. Dankie ook aan Nanike, Jacques, Roos en Kobus vir hul moeite om die stalletjie te versier met foto’s, inligting te verskaf en vir hul hulp met die bemanning van die stalletjie. Mag die Staatmakers die vrugte van hierdie harde werk pluk.

Ons braai alweer, nes boere kan.

2009-02-03T13:58:00.006+02:00

Op ‘n lekker lente aand het ‘n paar Staatmakers uitgedos in hul eie voorstelling van Boeredrag, by die Stellenbosch Voortrekker Laer bymekaar gekom. Die vuur het teen daardie tyd al lekker gebrand, en daar is toe begin kuier soos net Staatmakers kan. In die kombuis het ‘n paar meisies onder leiding van Nanike, aan die werk gespring om ‘n paar braaibroodjies vir die hongeres aan mekaar te slaan. Met die broodjies klaar het dit heel jolig om die vuur begin raak.

Almal het ‘n interessante voorstelling van Boere drag gehad, en alhoewel Jakobus se Rambo-Boere drag afwesig was, het hy steeds daarvoor opgemaak met ‘n splinternuwe kostuum. Nadat ons lekker om die vuur geskerts en gespot het, het almal lekker gesmul aan die vleis wat deur die Braaiers gebraai is. Die aand het ook as ‘n afsluiting vir die Staatmakers van 2008 gedien, net voor die gevreesde laaste eksamen var die jaar. Die jaar was daarom goed afgesluit, en die Staatmakers was waarlik geseën om uitstekende nuwe lede by te kry, wat net ‘n aanwins vir die Stellenbosch Staatmakers sal wees.

Vuur en vlam vir Braaidag

2008-11-18T00:41:00.008+02:00

Stellenbosch, 24 September 2008 – Net ‘n bondel syfers en letters vir diegene wat nie beleef het wat die Quercus Staatmakers en hul onverwante gaste daardie dag ondervind het nie. Hierdie dag sal voortleef in hul geheue as ‘n dag van pret, plesier, goeie geselskap, ou vriende, nuwe vriende, warmte in die koue, lekker koeldrank, lekker kos... Aan die algemene publiek staan hierdie dag bekend as Erfenisdag of Nasionale Braaidag.

Die geselligheid het die middag afgeskop nadat die meerderheid mense opgedaag het, alhoewel hul aankoms op Staatmakertyd was (nie stiptelik nie, maar seker). Nie-Voortrekkers is ook uitgenooi na die viering toe en talle het opgedaag. Statistieke is vervelig, maar 4 uit elke 10 mense was onverwante gaste.

Soos dit ‘n Voortrekker betaam is ‘n vuur so gou as moontlik aangesteek (binne ‘n veilige afgebakende area spesifiek ingerig vir dié doel). Die vuur het almal teenwoordig van warmte en lig verskaf deur die res van wat ‘n koue Stellenbosch lentedag was. Nadat die vuur aangesteek was het die kuier begin. Die vuur was die enigste sosiale stimulant wat Quercus benodig het.

Almal het lekker saam gekuier en sommiges het Erfenisdag op ‘n unieke manier gevier deur een van Afrikaans se stamtale, Duits, te gebruik in hul gesprekke. Nadat hul vuur die einde van sy kort leeftyd bereik het, het die Staatmakers hul kos op die kole voorberei soos hul voorouers dit moes gedoen het. Elkeen het ‘n geleentheid gekry om die vleis te draai en sodoende te deel in hierdie belangrike uitbeelding van ons erfenis.

Die voorsitter van Quercus, Jacques Louw, was nie beskikbaar gewees vir kommentaar na afloop van die braai nie weens ander verpligtinge. Die Erfenisdagviering was ‘n reuse sukses. Almal het dit geniet en het gesê dat hulle in die toekoms beslis weer sal deelneem. Ter herdenking van die gebeure op hierdie dag gaan Quercus elke jaar op 24 September dié dag op dieselfde wyse vier sodat toekomstige Staatmakers Quercus se ryk erfenis eerstehands kan ondervind.

Kaaplandse Saamtrek

2008-09-20T22:45:00.000+02:00

Die laaste naweek van die universiteit se September vakansie, het ’n stuk of tien staatmakers uit die Kaapland streek bymekaar gekom vir die jaarlikse saamtrek. Die mees verteenwoordigende groep was natuurlik die staatmakers van Quercus, Stellenbosch. Die groep van Setlaars het twee verteenwoordigers gehad en George van Tygerberg het ook die kamp meegemaak.

Die Vrydagaand teen ongeveer aguur was alle kampgangers reeds op Wemmershoek, waar hulle in die trein begin nesskrop het. Die eerste aand was die kombuis span so te sê op bystand, behalwe nou vir die braaibroodjies wat hulle voorsien het. Die staatmakers het hulle eie vleisie op die kole gegooi en lekker gekuier om die vuur, terwyl die weer ons so genadig was.

Die Saterdagoggend het Jacques die rontes gedoen om almal uit die bed te kry. Teen tienuur, na ’n koppie koffie en ’n stewige ontbyt deur nig Barbie, is die vergadering geopen. Die besprekingpunte het nie werklik iets opgelewer wat ’n mens as reviolusionêr sou beskryf nie, maar alles wat gesê is was die moeite werd en in een of ander sin nodig.

Na die middag het diegene wat nog oorgebly het hulle self begin gereedmaak vir die middag se vermaak. Verfbal, wat vinnig besig is om die staatmakers se nuwe amptelike sport in die Wes-Kaap te word, is net wat ons nodig gehad het op ’n luilekker, warm Saterdagmiddag… Die hitte het die dik klere weggehou en die verf, saam met die sweet het geloop. ’n Pouse tussendeur met koue koeldrank was genoeg om asem te skep en vir Louw en Hendrik om te besluit dat dit nou tyd was vir kaal bolyf. Nodeloos om te sê dat die stryd in iets soortgelyk aan selfmoordbomaanvalle geëindig het. Soos die staatmakers minder en minder omgegee het oor die verfkolle en pyn van die harde balletjies het die pretfaktor en bloukolle toegeneem.

Nadat almal hulself onder ’n stort gehad het, was ons reg vir die aand se mafia dinee. Hier moet ek darm nou eers myself onderbreek om vir nig Barbie dankie te sê vir ‘n ongelooflike aand. Die kos, dekor en sommer alles was puik. Die ete is gevolg deur ’n spel poker. En net voordat sommige “alles” verloor het is dit beëindig deur die voorstel dat ons eerder om ’n vuur kan gaan kuier. Dit was winderig maar nie koud nie, en die gees was nog sterk.

Sondagoggend het Jacques se gewildheid as voorsitter ’n algehele laagtepunt beryk toe hy bykans almal dou voor dag uit die bed jaag het. Dit was ook maar goed, want Sias Mostert was reeds daar. Die oggend se ontbyt is gevolg deur bybelstudie gelei deur Sias. Daarna het ons die vinnige proses van opruim afgehandel voordat almal begin verdaag het.

Ek dink ek kan vir almal praat as ek sê dat dit rêrig ’n ongelooflike naweek was. En daarvoor dink ek skuld ons vir Jaqi ’n groot dankie, wat alles op sulke kort kennisgewing gereël het.

NSK – Nat suiker koekies ?

2008-09-20T22:41:00.000+02:00

Hulle sê as jy ver gaan trek moet die osse vars, die rieme styf en die wapens gelaai wees. Vir ‘n baie ver ent moet jy ook seker maak dat daar genoegsame geskikte weiding vir die osse op die pad en by jou destinasie is.

Vier Quercus Staatmakers het nie geweet watter gras is daar te eet by die Vaaldam nie, maar het, voor die haan al ‘n piep gemaak het, daarna vertrek om te gaan sien.

Na etlike ure, wat stowwerige landsakp ingesluit het (ek dink hulle sê die staat is vry?), het ons die vreugdevure bereik en en is ons gegroet met ‘n hartlike, “die kapenaars is uiteindelik hier!” Vinnig was hande uitgesteek na en van ou kenisse en gesprekke is aangeknoop.

By die volgende dag se vergaderde samekoms het ons gevoel dat ons ‘n betekenisvolle bydrae gelewer het tot die sake wat bespreek is, daar was o.a. gepraat oor die feit dat alle staatmakers die staatmakerkursus moet voltooi.

Na rustige verdere gebeure het ons die aand gereek gemaak vir ‘n uitheemse jolifikasie, Meksiko “style” – Olé! ( maar vra jouself af, wat is enige dinee nou sonder ‘n tikkie boere style?).

“Osse!”

“Reg!”

“Rieme!”

“Styf!”

“Wapens!”

“Gelaai!”

en ons is weer op pad. Nou kan ek ook darem al sê ek het op ‘n koue oggend langs die vaal dam opgestaan.

Die tog terug was wel anders, maar tog interresant en met die aankoms was die drywer dalk moeër as die osse, maar ons het gevoel dat hierdie reis (op-tog) na bo en terug was werklik die moeite werd. Ons moet eintlik gekeer word om weer te gaan!

Die Vlotvaart

2008-09-20T22:38:00.000+02:00

Die gedagte aan vlotvaart was altyd een van die mees opwindendste van my jare as Verkenner gewees. Die uitsien na die vertrek met die vragmotor met al die dromme en planke daar van ons plaas op Wellington. En nou dat ek hier op Stellenbosch by die Quercus Staatmakers aangsluit het, is my lojaliteite ietwat verdeel.

Want sien, die Quecus Staatmakers wat vanjaar aan die vlotvaart deelgeneem het, was maar hoofsaaklik die ou Wellingtonners, en dan het hulle boonop nog met een van Wamekersvallei se vlotte gevaar.

Om die politieke inkorrektheid van die hele situasie net nog verder te vereger is ons ook ingeskryf as ’n Wellington vlot. Maar alle ongeruimdhede en ook die debatte oor waar presies ons vandaan kom raak werklik irrelevant as ons onthou dat almal by die Vlotvaart ons sleg ken as die Staatmakers.

Die dag op die water was taai, want die heemrade van Wamakersvallei (algemeen bekend as die “Ou Manne”), was nie van plan om deur een van hulle eie vlotte, beman deur van hulle eie kinders, weggeroei te word nie.

As hulle hul sin kon hê… wel, dan sou dit beteken dat my hande verniet so van die blase sou gelyk het. Die waarheid is egter vandag gekskiedenis. En dit is dat ons gewen het. En net om vir die mense van Wamakersvallei dankie te sê vir die volt, ontvang ons die trofee as ’n span van Wamakersvallei. En so word die kommando van ons kinderdae die een om daardie dag weg te stap met drie van die vier afdelings se eersteplekke!

Viva Quercus!

Nagmars reën uit

2008-09-20T22:34:00.000+02:00

Die Wes-Kaap nagmars wat op 10 Mei sou plaasvind, het behoorlik vanjaar saam met die res van Lourensford weggespoel. Daar is al vroeg die Saterdag oggend begin werskaf om ten spyte van al die modder en damme water, steeds hoopvol die aand se roetes voor te berei. Die dag se harde werk en die feit dat die middagprogram sonder enige erge reën voorgegaan het, kon egter ongelukkig nie die aand se onweer keer nie. Maar soos hulle sê, 'n boer maak 'n plan... en daar is toe besluit om sommer die Nagmars om te ruil met die Verkenner Sokkie wat later in die jaar sou plaasvind. Die terleurstelling was toe darem nie te groot nie en met die belofte van 'n nagmars op 17 Oktober, het die Verkenners hulself steeds geniet deur die res van die aand te dans.

Inlywingskamp 2008

2008-09-14T17:03:00.000+02:00

Die eerste naweek van Augustus is hierdie jaar behoorlik saam met die nuwe lede van Quercus Staatmakers ingelyf. Behalwe vir die formele inlywingseremonie wat die Saterdag aand plaasgevind het, is daar ook lekker paintball gespeel (wat gesorg het vir minder en meer ernstige beserings...) en gesellig tot laat om die tradisionele Wemmerhoek kampvuur gekuier. Die ouer lede is natuurlik ook deur die nuwelinge se aandprogram en konsertjies vermaak - ‘n wonderlike geleentheid vir die groep om mekaar beter te leer ken. Sondag oggend na veldkerk was die sjokolade fabriek in Franschoek die laaste stop voor ons terug is Stellenbosch toe. Dit was voorwaar ‘n goeie ervaring om so ‘n rustige, elektrisiteitlose naweek deur te bring in die natuur en bietjie af te skakel na die semester se rowwe begin.

Die is een van ons groep foto's wat op 2008 se inlywingskamp geneem is op Wemmershoek (Skerpioen-laagte).

Agter van links: Jacobus, Jacques, Rosa, Nanike en Charl.
Voor van links: Inus, Kobus en Dané.